O PP optou por aforrar estes recursos en lugar de investilos nos dependentes e nas familias que están á espera de ser valoradas

Santiago de Compostela, 24 de setembro de 2024. A portavoz de Política Social do Grupo Socialista, Silvia Longueira, acusou ao goberno galego de deixar “abandonados” aos dependentes galegos. Así o dixo logo de coñecer o último informe do Observatorio Estatal da Dependencia, elaborado pola Asociación Estatal de Directores e Xerentes de Servizos Sociais, que corrobora a falta de apoio do goberno do PP aos máis vulnerables, que as e os socialistas galegos levan tempo denunciando.

Silvia Longueira, deputada socialista no Parlamento de Galicia, destacou que o Plan de Choque impulsado polo Goberno de Pedro Sánchez para o período 2020-2023 supuxo un incremento de máis do 138% nos fondos destinados á Lei de Dependencia. Este incremento, dixo, tiña como obxectivo primordial dar un pulo necesario á Lei de Dependencia en Galicia, "unha das comunidades que máis o precisa tanto na prestación de servizos como na valoración de dependentes".

Con todo, a deputada socialista subliña que, a pesar deste significativo aumento no financiamento, a Xunta de Galicia decidiu non aportar a súa parte correspondente. En lugar diso, o goberno autonómico optou por aforrar estes recursos en lugar de investilos nos dependentes e nas familias que están á espera de ser valoradas. Isto resultou nun claro incumprimento das súas responsabilidades, deixando a numerosas persoas en situación de vulnerabilidade e á espera de atención.

Silvia Longueira destacou que esta é unha consecuencia directa da política que a Xunta de Galicia leva practicando na área de Asuntos Sociais, que levou a Galicia a ser unha das comunidades con maior número de persoas esperando por unha valoración. Longueira advirte que a falta de acción e compromiso por parte do goberno autonómico está a agravar a situación de moitas familias que dependen destes servizos esenciais.