Información
A Coruña

A primeira skate-praza da Costa da Morte estará lista antes de que remate o ano

Información
16 Agosto 2018 761 votos
1 1 1 1 1 1 1 1 1 1
Evencio Ferrero e Milagros Lantes, durante a visita de hoxe

Evencio Ferrero e Milagros Lantes, durante a visita de hoxe

Xusto dous meses despois da sinatura do contrato para a execución da obra, a skate-praza que está a construír o Concello de Carballo xunto á Biblioteca Rego da Balsa avanza a moi boa velocidade. O alcalde, Evencio Ferrero, visitou hoxe a obra acompañado pola concelleira de Planificación e Mobilidade Urbana, Milagros Lantes, e o concelleiro de Deporte e Cultura, Marcos Trigo. Como puideron comprobar, o aspecto da parcela cambiou substancialmente en só unhas semanas. As persoas que se acheguen estes días ata alí poden empezar a intuír xa como será a distribución do espazo, concibido para dar resposta á demanda dun importante sector da mocidade para ter un lugar no que practicar o deporte do skate, pero tamén como un novo lugar de ocio e tempo libre para toda a familia do que poderemos gozar antes de que remate o ano

.

A skate praza é un proxecto pioneiro na Costa da Morte que nace don dúas finalidades. Desde o punto de vista urbanístico, completar a ordenación do solo de equipamentos cunha solución que dea continuidade ao importante espazo dinamizador que xa é a Biblioteca Rego da Balsa e convertendo esa mazá nun elemento xerador de urbanidade de cara ao futuro desenvolvemento de todo ese ámbito. Desde o punto de vista social, a nova praza, deseñada polo mesmo arquitecto que a biblioteca, mantén a filosofía de flexibilidade, dinamismo e intercambio social.

Recreación do acabado final da praza

Recreación do acabado final da praza

Partindo desas premisas, o novo espazo será unha continuación do patio central da biblioteca, no que poderán realizarse actividades de bibliopraza e que contará cunha zona de extensión da biblioteca infantil con pavimento de caucho e xogos. Tamén se creará unha zona de estancia con sol e sombra para usuarios/as de diferentes idades, unha franxa arborada e pavimentada para a práctica do baile ou slalom, e unha skate-praza pensada para o público adolescente e non tanto que vén reclamando este tipo de equipamentos. O investimento acada os 145.200 euros.

Otros articulos relacionados.....