Gres (Vila de Cruces), 2 de novembro de 2024.- Coa lectura do xa célebre “Eu son Balbino, un rapaz da aldea…” arrinca mañá a homenaxe anual que amigos, admiradores, lectores e lectoras adican á figura de Neira Vilas co gallo do aniversario do seu nacemento. A sede da fundación que leva o seu nome, no lugar de Gres, acollerá nesta ocasión a lectura pública e continuada de Memorias dun neno labrego, coa que deixar constancia da frescura e a vixencia dun clásico das nosas letras. O acto comezará ás 17.00 h.

Entre os lectores e lectoras que se achegarán á Casa do Romano, sede da fundación do autor de Gres, están confirmados Valentín García, Secretario Xeral de Lingua, e Iria Aldegunde, autora da adaptación ao cómic da inesquecible novela de Neira Vilas, e que se deu a coñecer neste ano 2024 a cargo da editorial Galaxia.

Por outra banda, mañá remata, precisamente, o prazo para a recepción de orixinais que concorren ao Premio Xosé Neira Vilas de Literatura Xuvenil, que a devandita fundación convoca en colaboración coa Editorial Galaxia. Ademais, aínda é posible enviar propostas para outro dos premios que convoca a fundación, nese caso en colaboración coa empresa Deleite e GALIX: o premio Arume de Poesía para a Infancia, para o que se poden enviar propostas ata o 15 de novembro.