AMNISTIA FISCAL, TRAMAS OCULTAS E PRIVATIZACION DA SANIDADE PÚBLICA ORQUESTADAS POLO PP

Información
Galicia | 15 Junio 2016 | 4464 votos Regístrese para votar | Correo electrónico | Imprimir
social youtube xornalgalicia   feed-image

A recente publicación nalgúns medios de comunicación dos denominados “Papeles de la Castellana puxo en evidencia máis irregularidades dos procesos de privatización do sistema sanitario público por parte do goberno do PP, xa que se confirma que empresas beneficiarias destes procesos, que teceron alianzas con laboratorios farmacéuticos, entidades bancarias, empresas de autopistas ou multinacionais para beneficiarse de fondos públicos, defraudaron ao fisco.

O Grupo Vithas Saúde naceu en 2012 coa compra de hospitais a Adeslas. Pertence ao fondo de capital risco Goodgrower dos irmáns Gallardo e da Caixa. O grupo integrou no momento da súa constitución a 10 hospitais e 3.100 profesionais e 1,5 millóns de pacientes, en gran parte derivados do sistema público. A creación foi apoiada e bendicida pola Secretaria Xeral de Sanidade e Consumo, Pilar Farjas.

 

A creación de Vithas produciuse de xeito simultánea á regularización polo Ministerio de Facenda dos 113 millóns de euros que os compradores mantiñan ocultos en Suiza e Panamá. É dicir a creación do grupo realizouse grazas á legalización de 113 millóns de euros ocultos en paraísos fiscais para non pagar impostos en España. Os donos do grupo, pagaron grazas á amnistía fiscal apenas 2,7 millóns (2,4% do diñeiro opaco que escondían en Suiza a través de dúas empresas de Panamá e dos bancos JPMorgan, Lloyd´s, e Rothschild).

Os donos do grupo son tamén os máximos accionistas do laboratorio farmacéuticoAlmirall (66%) un dos maiores de España, cun valor en bolsa próximo aos 2.500 M e que factura millóns de euros á sanidade pública (o gasto farmacéutico en España é moi superior á media dos países europeos).

Cando a Xunta decidiu privatizar o Laboratorio Central de Galicia (freando o desenvolvemento dos laboratorios dos hospitais públicos e poñendo en perigo os datos máis sensibles da poboación galega), realizou un concurso ao que se presentaron sete laboratorios, aínda que o contrato foi adxudicado a unha Unión Temporal de Empresas integrada por Cerba (Unilabs) e Lema e Bandín, que presentaron a oferta económicamente máis baixa ( cunha baixa temeraria de 40% con respecto ás outras empresas concorrentes). Mais tarde Lema e Bandin e Vithas uníronse situando o Laboratorio Central de Galicia, Privado, no hospital de Fátima de Vigo.

Posteriormente numerosas Comunidades Autónomas ampliaron concertos e concesións de servizos sanitarios públicos con este grupo: En Galicia o sanatorio Nosa Señora de Fátima (catro millóns de euros.); en Canarias os centros Santa Catalina (As Palmas de Gran Canaria) e Santa Cruz, en Tenerife,; en Baleares en alianza con Asistencial Juaneda, conseguiu facerse coa radioterapia dos hospitais públicos de Ibiza e Menorca; na Comunidade Valenciana, Vithas Perpetuo Socorro de Alacante recibiu máis de 400.000 euros para intervencións de cataratas ou xoanetes; en Andalucía o hospital Vithas Virxe do Mar de Almería conseguiu un contrato para atender a enfermos pluripatolóxicos e coidados paliativos por un millón de euros. Todo isto permitiulle ampliar o negocio, comprar dous novos hospitais e facturar un 34% máis que en 2012.

Vithas tamén recibe contratos públicos para asistencia sanitaria coas Mutuas de Accidentes de Traballo e Enfermidades Profesionais (financiadas coas cotas obrigatorias de traballadores e empresarios): Vithas Nosa Señora de Fátima de Vigo recibiu o contrato da Mutua Galega para dous anos; Vithas Nosa Señora da Saúde de Granada obtivo a licitación da Mutua Universal Mugenat por 560.000 euros ou Vithas de Benalmádena (Málaga) conseguiu o contrato con Ibermutuamur por dous anos e 500.000 euros.

Para rematar este grupo empresarial posúe o 50% do fondo de investimento G Square Capital, que controla o xigante do sector xeriátrico SAR Quavitae,beneficiario de concertos e concesións de residencias de anciáns en diferentes gobernos autonómicos, máis de cen concellos e tres deputacións provinciais. Tamén é adxudicataria de servizos da teleasistencia ou a asistencia a domicilio en numerosos concellos.

Resulta inaceptable e escandaloso que unha empresa privada que defrauda os impostos cos que se financia a sanidade pública benefíciese dunha amnistía fiscal e cre un negocio que recibe inxentes fondos públicos a través de concertos con administracións sanitarias.

Para acabar con esta política de parasitación e desmantelamento da sanidade pública por empresas privadas, desde a FADSP consideramos que un novo goberno debería adoptar tres importantes decisións:

1.- Abrir auditorías a todos os contratos, concertos e concesións de servizos sanitarios con empresas privadas, e recuperar os recursos externalizados de xeito irregular ou fraudulenta.

2.- Acabar coas amnistías fiscais que perdoan débedas a quen sacan diñeiro ao estranxeiro para non pagar impostos.

3.- Prohibir de xeito expresa que, empresas que haxan defraudado á Facenda Pública e con diñeiro en paraísos fiscais, poidan acceder a contratos coas administracións públicas.


TAMBIÉN LE PUEDE INTERESARlineaazul 1600