Información
Galicia

“Saúde e Terra, irmá(n)s!” inaugura en Vigo a súa itinerancia fóra da Coruña

Información
09 Agosto 2016 2186 votos
1 1 1 1 1 1 1 1 1 1

Da mesma maneira que as Irmandades da Fala irradiaron a súa acción desde a Coruña, a exposición "Saúde e Terra, irmá(n)s" que conmemora o seu centenario comeza agora en Vigo a percorrer o país, despois de ser inaugurada na Coruña e Santiago. A mostra está promovida pola área de Cultura da Deputación da Coruña, a Real Academia Galega e o Museo do Pobo Galego e conta coa colaboración da área de Cultura da Deputación de Pontevedra.

Este xoves día 10, ás 11.30, inaugurarase na Fundación Barrié, en Vigo, a exposición conmemorativa do centenario das Irmandades da Fala, "Saúde e Terra, irmá (n)s!". No acto de inauguración participarán a vicepresidenta e responsábel de Cultura da Deputación da Coruña, Goretti Sanmartín, o presidente da Real Academia Galega, Xesús Alonso Montero, o presidente do padroado do Museo do Pobo Galego, Xusto Beramendi e o responsábel da área de Cultura da Deputación de Pontevedra, Xosé Leal.

A mostra, que estará aberta até o vindeiro 8 de setembro, chega a Vigo despois de se expoñer na Coruña e en Santiago,nun itinerario que a levará a seguir a Pontevedra -14 setembro-2 outubro-, Ourense -6 outubro-30 outubro-, Lugo -4 novembro-27 novembro- e, finalmente, Ferrol -2 decembro-27 decembro-. Para a itinerancia, o proxecto conta coa colaboración das Deputacións de Pontevedra, Lugo e Ourense.

A exposición conmemorativa do centenario das Irmandades da Fala busca difundir o legado do movemento que naceu o 18 de maio de 1916 na Coruña mais que se rapidamente se espallou por todo o país. A través destes dez espazos, o público achegarase á orixe do movemento e á súa evolución, desde a acción centrada en primeiro lugar na normalización do idioma ata a intervención política e os seus principais protagonistas; o novo rexurdimento literario e editorial, o compromiso coa nova arte e teatro galegos, a emerxencia das ciencias sociais e experimentais, a creación das Escolas do Insiño Galego ou a importancia que lles concederon aos medios de comunicación as Irmandades, que se dotaron do seu propio voceiro, A Nosa Terra, e promoveron a reaparición d'O Tío Marcos d'A Portela, entre outras cabeceiras editadas en Galicia e na diáspora.

Saúde e Terra, irmá(n)s! dá ademais visibilidade á participación das mulleres nas Irmandades da Fala, que apostaron desde o primeiro momento pola "igualdade absoluta, política e civil da muller e do home". Esta declaración dunha asemblea de irmáns e irmás reflicte o compromiso político do movemento nuns tempos nos que o voto feminino aínda tardaría anos en chegar. As mulleres loitan na Irmandade Feminina, creada na Coruña en 1918, participan no teatro, aparecen nas palestras dos mitins e algunhas colaboran n'A Nosa Terra. Con dirixentes como Amparo López Jean, Micaela Chao, Elvira Bao ou María Miramontes, empezaron sendo un medio cento, pero na década dos anos 30 a cifra foi en aumento ata chegaren a ser o 10% da militancia do Partido Galeguista.

Pezas prestadas

Ademais das fotografías e documentos reproducidos, a exposición xunta unhas 130 pezas, documentos orixinais e primeiras edicións prestadas para a ocasión por máis dunha trintena de institucións e coleccións particulares. Entre as pezas integradas nas cabinas, figuran obxectos persoais como as lentes de Vicente Risco e de Ramón Cabanillas, os carnés das Irmandades da Fala de Ramón Villar Ponte e Antonia Pardo, unha plumiña de Álvaro Cebreiro, a máquina de escribir de Valentín Paz Andrade e o violín que Manuel Quiroga doou ao seu amigo Antón Losada Diéguez; o manuscrito autógrafo de Arredor de si, de Otero Pedrayo, outro texto manuscrito do programa da I Asemblea Nacionalista ou a carta-nota ao gobernador civil que anuncia que a Irmandade da Fala se converterá no Partido Galeguista.

O estandarte de "Queixumes dos Pinos" da Coral Polifónica Follas Novas (1922), e obras de arte como os óleos "Soidade", de María Corredoira, "Valle Esmeralda" (1912), de Francisco Lloréns e "Nube da tarde", de Imeldo Corral; e a talla "Galicia, Nai e Señora", de Uxío Souto (1926), tamén forman parte da exposición.

O proxecto expositivo de conmemoración do centenario das Irmandades da Fala organizado pola Real Academia Galega, a Deputación da Coruña e o Museo do Pobo Galego coa colaboración das Deputacións de Pontevedra, Ourense e Lugo –que promoven a itinerancia- conta co apoio de catorce entidades colaboradoras: a Real Academia Galega de Belas Artes; as fundacións Penzol, Otero Pedrayo, Antón Losada Diéguez, Vicente Risco, Castelao, Alexandre Bóveda, Isla Couto, Antonio Fraguas, Galiza Sempre e Moncho Reboiras; o Museo de Pontevedra, o Departamento de Galego-Portugués da UDC e Galiza Cultura.

Ademais dos fondos cedidos para a ocasión pola Real Academia Galega e o Museo do Pobo Galego, a maioría de entidades colaboradoras participan tamén na mostra como prestadoras. Esta homenaxe ás Irmandades amosará tamén documentos e pezas de arte cedidas tanto pola Fundación Barrié, o Instituto de Estudos Galegos Padre Sarmiento, o Museo Carlos Maside, o Museo de Belas Artes da Coruña, o Parlamento de Galicia e a Biblioteca Provincial da Coruña, como por particulares, algúns deles familiares de integrantes das Irmandades da Fala.

A exposición conta cunha colaboración especial das áreas de Cultura das deputacións de Lugo, Ourense e Pontevedra que permite a itinerancia nas cidades de Vigo, Pontevedra, Ourense e Lugo. Cómpre tamén mencionar o agradecemento á Fundación Barrié e ao Concello de Ferrol, que abre as portas do Centro Torrente Ballester para a mostra.

Otros articulos relacionados.....