Miguel de la Calle Amaro recibiu a Insignia de Ouro da USC

Información
Galicia | 19 Diciembre 2016 | 3790 votos - Registrese para votar | Correo electrónico | Imprimir
social youtube xornalgalicia   feed-image

O reitor Juan Viaño impúxolle este venres a insignia de ouro da USC a Miguel de la Calle Amaro, que foi membro do Consello Social e representante deste órgano universitario no Consello de Goberno da USC. Ao acto asistiron familiares, amizades, compañeiros así como os tres últimos reitores da institución cos que coincidiu durante o seu cargo, entre outras personalidades, a quen De la Calle, moi emocionado, agradeceu “a confianza depositada en min para desempeñar esta responsabilidade”.
A insignia de ouro é un recoñecemento que a USC concede a aquelas  persoas físicas que sobresaian dun xeito especial nos servizos prestados á institución académica. “En definitiva, esta insignia está reservada a persoas coma Miguel de la Calle Amaro, un estradense que estudou económicas nesta universidade hai varias décadas e que foi capaz de xestionar con moito éxito algunhas das empresas máis importantes do tecido produtivo galego e que sempre defendeu esta institución con rigorosidade, contundencia e intelixencia”, dixo o reitor na cerimonia.
O actual presidente do Consello Social da USC, José María Arias Mosquera, lembrou na laudatio que Miguel de la Calle (A Estrada, 1948) compaxinou os seus estudos preuniversitarios cun traballo nunha fábrica de confección, “sendo un traballador polo día e un sobresaliente estudante pola noite, o que xa daba conta da persoa na que logo se converteu”, dixo.
De la Calle comezou a súa relación coa Universidade de Santiago de Compostela en 1969 cos estudos de Ciencias Económicas nuns tempos que el mesmo lembra “de gran axitación política”. Ao finalizalos, inicia a súa andaina laboral sempre ligado ao sector bancario e de auditorías; primeiro no Banco de Simeón, logo na Caixa de Aforros de Pontevedra e finalmente en Caixanova ata a súa prexubilación, momento no que reactiva a súa faceta de auditor e que compaxina ata a actualidade.
En 2008 foi nomeado conselleiro do Consello Social da USC, cargo que renovou por outros catro anos e que agora remata. Foi tamén membro da Comisión de Titulacións da Axencia para a Calidade do Sistema Universitario de Galicia en representación do Consello Social.