A Estación Fitopatolóxica acaba de emitir un aviso fitosanitario extraordinario no que se aconsella aplicar medidas para evitar que as eirugas completen o seu ciclo biolóxico

Información
Galicia | 10 Enero 2017 | 3702 votos | Correo electrónico | Imprimir
social youtube xornalgalicia   feed-image

ProcesionariaA Estación Fitopatolóxica Areeiro, dependente da Deputación de Pontevedra, acaba de emitir un aviso fitosanitario extraordinario de tipo forestal para advertir da actividade anticipada da procesionaria nos piñeiros da provincia. Segundo indican os técnicos, no caso de detectar procesións en xardíns con piñeiros ou cedros, é preciso aplicar as medidas necesarias para evitar que as eirugas completen o seu ciclo biolóxico. Así mesmo, en relación ás frondosas, aconsellan instalar trampas de feromonas para reducir as poboacións de eirugas defoliadoras que poidan afectar os gromos dos carballos.

Segundo indican desde o centro de investigación de Areeiro, nalgúns lugares da provincia xa se están a iniciar as procesións de enterramento das eirugas de Thaumetopoea pityocampa. Normalmente estas procesións comezan en marzo, e a data mais temperá que temos rexistrada ata agora foi en 2010, polo que a súa rápida aparición nestas datas de 2017 é inusual.

As procesións prodúcense cando as eirugas acadan a súa madurez -e as temperaturas son suaves-, abandonan os bolsóns, descenden polo tronco e entérranse no chan. Dado que estes insectos posúen pelos urticantes, que liberan cando se senten ameazados, producindo reaccións alérxicas e inflamatorias, é importante saber que non se deben manipular baixo ningún concepto. No caso de animais domésticos coma os cans, chegan mesmo a xerar necrose nos tecidos da boca e próximos.

A técnica Rosa Pérez explica que, "con todo, no caso de observar procesións en xardíns con piñeiros ou cedros, resultaría interesante evitar o enterramento das eirugas para impedir que continúen o seu ciclo biolóxico". Para iso pódese aplicar un insecticida piretroide ou ben impedir mecanicamente o proceso, coa precaución de usar todas as proteccións persoais posibles para evitar estes danos.

Frondosas

Por outra parte, desde mediados do mes de decembro os investigadores de Areeiro están a capturar numerosos machos de Operoptera brumata nas trampas de feromonas instaladas nas zonas de frondosas da comarca do Morrazo que en abril-maio estiveron afectadas por fortes defoliacións (ver aviso fitosanitario do 29/04/2016). "Considerando os fortes danos que poden causar en diferentes especies de frondosas, aconséllase a instalación destas trampas para reducir as poboacións que poidan afectar os gromos deste ano", asegura a técnica Rosa Pérez.