OS SOCIALISTAS PIDEN QUE A XUNTA ESIXA A DIMISIÓN DO DIRECTOR XERAL DE XUSTIZA DO ESTADO E UNHA AUDITORÍA EXTERNA POR LEXNE

  

Patricia Vilán pide que a Xunta se pronuncie “ante a gravidade das noticias sobre o libre acceso aos datos persoalísimos” que manexa a Xustiza

Santiago de Compostela, 1 de agosto de 17. A portavoz de Xustiza do grupo socialista, Patricia Vilán, vén de rexistrar varias iniciativas no Parlamento nas que insta á Xunta a demandarlle ao Goberno do Estado a dimisión do director xeral de Xustiza e reclama unha auditoría externa que avalíe a implantación do sistema LexNet en Galicia. Vilán pide que o goberno galego se pronuncie ante “a gravidade das noticias sobre o libre acceso aos datos persoalísimos” que manexa a Administración de Xustiza.

A socialista lembra que “xa hai tempo que os distintos operadores xurídicos advertían de que a fiabilidade do sistema non era boa, fiable nin controlable”, e que desde a súa implantación o 1 de xaneiro de 2016 este sistema presenta “multitude de problemas”. Vilán pregunta se a Xunta coñecía estas advertencias e se “ten coñecemento do alcance deste ataque contra os dereitos fundamentais dos cidadáns de Galicia”.