Información
Galicia

A Real Academia Galega lamenta o pasamento do académico correspondente Víctor Campio Pereira González

Información
24 Julio 2018 819 votos
1 1 1 1 1 1 1 1 1 1
  • RAG Victor Campio PereiraO escritor, membro da institución desde o ano 2011, faleceu hoxe en Ourense

  • Autor dunha obra literaria que abrangueu a poesía, a novela, o ensaio e o articulismo, foi un activista cultural destacado na cidade de Ourense desde os últimos anos do franquismo

     

A Coruña, 24 de xullo de 2018.- A Real Academia Galega expresa o seu fondo pesar polo pasamento de Víctor Campio Pereira (Maside, 15 de xullo de 1928 - Ourense, 24 de xullo de 2018). Membro correspondente da institución desde o ano 2011, o escritor publicou poesía, novela e ensaio, e participou desde os últimos anos da ditadura franquista de maneira moi activa na vida cultural de Ourense, onde faleceu hoxe aos 90 nos de idade. A capela ardente de Víctor Campio Pereira González está instalada no tanatorio As Burgas de Ourense.

Víctor Campio Pereira compaxinou a docencia coa produción literaria e un activismo cultural sempre vinculado a Ourense, onde se xubilou como profesor de secundaria no IES As Lagoas. A súa obra literaria abrangue varios libros de poesía -O ar que nos leva (1987), Perdida luz (2000), O aire, a luz e o canto. Poesía reunida 1987-2006 (2008) e Quince sonetos de amor e once poemas máis (2011)- a novela Baixo o sol do Magreb (1998) e o ensaio Escritos en do menor (2001).

Tamén participou nas obras colectivas Sete poetas ourensáns (1992), Poesía dos aléns (2003) e Poetas e narradores nas súas voces. II (2006), e foi articulista en revistas e xornais, especialmente en La Región.

Víctor Campio Pereira foi distinguido como fillo predilecto de Maside, o seu concello natal, en 2010 e foi elixido membro correspondente da Real Academia Galega en 2011. Ese mesmo ano tamén foi nomeado membro de honra da Asociación de Escritores e Escritoras en Lingua Galega e en 2012 concedéuselle o premio Sete Carballas da Insua dos Poetas. O pasado mes de outubro o autor foi homenaxeado en Ourense en recoñecemento a toda a súa traxectoria, nun acto organizado polo Ateneo de Ourense e o PEN Galicia no que tamén participou a RAG.

Otros articulos relacionados.....