Información
Localidades de Galicia

O PSOE deseña un proxecto “realista e factible” para devolverlle o río dos Gafos ao barrio de Campolongo

Información
21 Febrero 2019 221 votos
1 1 1 1 1 1 1 1 1 1

Os socialistas propoñen unha peonalización ‘branda’ da rúa Iglesias
Vilarelle co fin de integrar os parques da Seta e a Constitución


Pontevedra.- O plan integral de mellora deseñado polo grupo municipal
do PSOE para o barrio de Campolongo inclúe “un proxecto realista” que
permitiría “saldar unha débeda histórica” con esta zona da cidade:
destapar o treito do río dos Gafos que discorre entre o Parque da
Constitución e a rúa Iglesias Vilarelle. Tras moitos anos de reivindicacións
veciñais e promesas que “quedaron en papel mollado”, o candidato
socialista á Alcaldía de Pontevedra, Agustín Fernández, considera
“factible” que a actuación “en fases” plantexada polo seu equipo no Paseo
de Valle-Inclán (dende a rúa Alcalde Hevia até a altura do complexo
deportivo de Campolongo) conte coa implicación da Administración central
para a súa execución.
Segundo constata, o río leva dende a década dos 70 privado de luz e de
osíxeno, polo que “frónte a outras propostas faraónicas e imposibles de
executar”, vai sendo hora de poñer enriba da mesa un proxecto “de
carácter progresivo, serio e con avais”. Neste sentido, o PSOE entende
que a descoberta do afluente debería levarse a cabo inicialmente neste
treito, que presenta poucos problemas de carácter técnico (ao tratarse
dun espazo de parque sen tráfico de vehículos), con vistas a destapalo
posteriormente noutras áreas se os veciños o consideran oportuno. “Esta
actuación -matiza Fernández- non afectaría polo tanto á zona do Paseo
de Valle-Inclán que dá acceso aos colexios. Unha vez destapado este
primeiro treito, falaríase coas Anpas e os veciños para consensuar a
posibilidade dunha segunda fase”.
O candidato do PSOE por Pontevedra amósase optimista ante a
posibilidade de contar coa implicación da Administración estatal para
este proxecto, que encaixa á perfección coa decidida política de
protección do patrimonio natural desenvolvida polo Ministerio para la
Transición Ecológica (departamento dirixido pola tamén socialista Teresa
Ribera).
O plan integral tamén contempla a actuación inmediata sobre algunhas
parcelas privadas emprazadas no entronque das rúas Alcalde Hevia e
María Victoria Moreno, que se convertiron en auténticos vertedoiros
infestados de lixo, ratas e bolsas de plástico. Tal e como explica Agustín
Fernández, trátase de fincas “cun grao de degradación enorme para estar
ao borde dun río”, polo que só existe unha solución: “esixirlles aos
propietarios a súa limpeza baixo ameaza de execución subsidiaria por
parte do Concello, coa correspondente ‘receta’ económica”.
Neste mesmo sentido, o PSOE considera necesario levar a cabo
campañas periódicas de desratización coa finalidade de tentar atallar o
problema da proliferación de roedores que se dá no contorno do río. A
mellora da limpeza e da recollida de lixo en todo Campolongo, a
substitución dos contedores en mal estado, o cambio dos bancos
situados no paseo dos Gafos por outros máis ergonómicos e a axeitada
poda das árbores da avenida de Augusto García Sánchez son outras das
propostas presentadas polos socialistas no contexto dunha xornada de
inspección sobre o terreo no barrio pontevedrés.
Rematar cos asolagamentos
Tino Fernández tamén considera prioritario mellorar o sistema de
canalización de augas pluviais no Parque da Constitución, co obxectivo
de rematar coas enormes pozas e asolagamentos que se producen “cada
vez que chove un pouco”. “O treito que vai dende a igrexa de
Campolongo até as escaleiras de acceso ao Parque da Seta -subliñaconvértese
nunha lagoa de barro en inverno”.
Acada-la integración do Parque da Seta na Praza da Constitución é outra
das principais reivindicacións veciñais recollidas polo grupo municipal do
PSOE no seu programa. Segundo precisa, a zona de xogos atópase
agora mesmo “infrautilizada”, cunhas rampas para bicicletas “que non
serven para nada” e literalmente cortada por unha estrada (a de Iglesias
Vilarelle) que impide a xeración dun espazo común e integrado. Na súa
opinión, a mellor solución pasaría por “unha peonalización ‘branda’ dese
treito da rúa Iglesias Vilarelle até Xeneral Rubín, pintándoa dunha cor
diferente, dándolles preferencia ás persoas sobre os coches e restrinxindo
o paso só aos residentes”.
Asemade, o paquete de medidas dos socialistas prevé a mellora do
alumeado do novo parque infantil de Campolongo para evitar a incidencia
de actos vandálicos polas noites; a limpeza da escultura da Praza da
Constitución; o control dos veladores que invaden as zonas de paso
peonil, e a colocación de ‘pivotes’ no entronque das rúas Manuel Leiras
Pulpeiro e San Pedro de Alcántara, xa que, co seu actual deseño, os
vehículos invaden de xeito sistemático as beirarrúas ao xirar. A visita que
Tino Fernández programou co seu equipo inclúe tamén o estudo do
contorno da Praza de Galicia, de cara a executar actuacións de mellora
da seguridade peonil na zona.